Ivan Cickin

Ivan Cickin

1832-1898

Rossiaf lingesik

« Rossia ~ patecta dem patectoy... Pokolé da ugal titir viele kotafa rossiafa tuwava blisa is kofina gan swava, kan rossiaf yambik zo disuketer. »

— Ivan Cickin

Ivan Ivanovitc Cickin ( rossiavon Иван Иванович Шишкин ) tir rossiaf lingesik.

Ivan Cickin mali rumeugal toz lingeyer aze remi blirugal wan askiyir ; lantan kalid da in va ogalt meviele al divgir. Zovdara tiyir lana vayara va tuwava. Milsareik va Cickin gu « Gulik ke rossiafo aalxo » is « Gindik ke aala » is « Guazafa pailtega » is « Antiafa persa » al dayoltad kiren metan ke bane sare va aal logeltrevon is loteldon is lorenason volayar.

To Rossia is moekote vofa aala al vanpid tiskiso dulapexo ke inafa abrotcifa is wemtafa is zultafa klepa. Grabom ke Cickin ton gotusa ewava va Rossia zo kiavad ise va warzafa okluca ta vof patectoy tukuvayad. Abdi Cickin, metan va albara va vowidava ik zijnafa listuca ke lentekafa tuwava ixam al kareizuyur.

« Cickin ~ cosaf yambik. Remi blirugal va rossiaca al vayar, va nelkon lentekafa aala is rossiaf aal is rossiafa danca. Batcoba tir inafo gindaxo ise va mek elicik dikir, tir tanaf. »

— Stasov

Grabom ke bat cugunaykaf yambik va gruvducapa koe Rossia is kotrafa tamava pojad ise al vanpid pulotaca ke rossiafa patectoyafa lingeropa. Remi balemoya sanda ke yambafa tegira, Ivan Cickin va konak decemoy lingeks isu zovdaks is jontik gretcaks warzeyer.

Tir kotunafa tula ke cugunaykaf fitc ke Cickin, numen Ivan Kramskoy yambik al stragar da in tiyir tsokapaf eke va izvafa yambafa wica tadleyer : « In miv tir lana serna... i vlupexa ke towara ke rossiaf patectoy ».